ليه الحب جميل كده؟
ليه من غيره بجد مفيش أي حاجة في العالم ليها طعم؟
ليه من غيره لا بنفرح أوي و لا بنزعل أوي؟
ليه بيه بنلمس السما و نقعد فوق النجوم و نطير مع كلمة حلوة أو لحن رقيق؟
ليه بتبقي أحلي لحظة في حياتك لما تحسي إن حبيبك سلملك زي الطفل ما بيسلم إيده لأمه؟
ليه بتموتي ببطء لما يزعل منك أو يزعلك و بعدين تتردلك روحك لما يصالحك حتي لو الفارق الزمني بين الحدثين 5 دقائق؟
ليه بتبقي شايفة كل حاجة حواليكي سودا و مفيش أمل و بعدين ييجي هوه و يقوللك إن كل حاجة بخير و هتبقي كويسة فتصدقيه و يرجعلك الأمل و تطمني و تحسي إن فعلاً كل حاجة بخير حتي لو هوه ميعرفش أصلاً مشكلتك و لا الحاجة إللي مضايقاكي؟
ليه بتموتي في إبتسامته و قلبك بيدق لنظرة عينيه و بتضحكي لما يضحك و تعيطي لو زعل أو تعب؟
ليه غصبن عنك بياخدك من أهلك و أصحابك و إهتماماتك و شغلك و كل حاجة في حياتك كانت أو كنتي فاكرة إنها مهمة؟
ليه حافظة لون بشرته و لون أسنانه و شكل صوابعه و طريقته في الأكل و رفة عينيه لما يبقي متضايق أو عصبي أو زعلان و بتحلمي باللحظة إللي هتشوفيه فيها و هو نايم؟
ليه بتحسي إنك ملكتي الدنيا كلها و اللي فيها بس لما تضحكيه أو تقولي رأي يعجبه؟
ليه إحساسك بيعلا أوي بكل حاجة حواليكي و بتشوفي الجمال في كل حاجة مهما كانت بساطتها؟
ليه أول ما بتشوفي طفل صغير بتفكري فيه؟
و ليه بعد ما تحسي بكل ده ممكن تيجي لحظة غادرة تتهد فيها كل حاجة عشان تدخلي في عالم موازي لهذا العالم السعيد الحالم من الحزن و الكآبة و الضياع؟
و بعد كل ده عايزة أسأل سؤال يا تري الحب نعمة أم لعنة؟
و ليه لما بتدخلي العالم ده بتدخليه بنفس السرعة إللي دخلتي بيها عالم الحب بس الفرق إنك بتعيشي تحلمي باليوم إللي تخرجي فيه منه .. عكس الحب؟
ليه الحب هوه الحاجة الوحيدة في الدنيا إللي ليها القدرة علي قلب حياة و مزاج و مشاعر و نظام الإنسان رأساً علي عقب بين لحظة و أخري و ربما بمعدل كل لحظة لتخلق داخله حالة من الإضطراب و عدم الإستقرار تصبح في حد ذاتها متعة يعشقها و يدمنها؟
[img]
http://photos1.blogger.com/blogger/6894/3254/320/romantic-couple-beach.0.jpg
